Matthieu 24.27
Les Évangiles en Corse

¹ Ghjesù era isciutu da u Tempiu è si n’andava ; i so discepuli s’avvicinonu per fà li vede e custruzzione di u Tempiu. ² Tandu li rispose è disse : « tuttu què, soca ùn lu vidite ? A vi dicu da veru, ùn firmerà quì petra annantu à petra chì ùn sia distrutta. » ³ Mentre ch’ellu pusava insù di u Monte à l’Alivi, i so discepuli li s’avvicinonu è, discurrendu trà di elli, li dissenu : « dì ci quand’ella accaderà, è qualessu ellu serà u segnu di u to avvenimentu è di u cumpiimentu di i seculi. » ⁴ Ghjesù li rispose è disse : « attenti chì nimu v’inganni, ⁵ chì parechji veneranu à nomu meu, dicendu : ‘eu, sò u Missia.’ È n’inganneranu parechji. ⁶ Avete da sente parlà di guerre è di nutizie di guerre. Attenti ! Ùn vi spaventate, chì ci vole ch’ella accadi, ma ùn hè ancu a fine. ⁷ Chì s’impetteranu nazione contru à nazione è regnu contru à regnu, è sicondu i lochi, accaderanu caristie è terramoti. ⁸ È tuttu què serà u principiu di e suffrenze di u partu. ⁹ Tandu vi si tribulerà è vi si tumberà, è sarete purtati in odiu da tutte e nazione per via di u mio nome. ¹⁰ È tandu, parechji seranu scandalizati, è trà di elli si tradisceranu, è s’odieranu trà di elli ; ¹¹ è parechji falsi prufeti s’alzaranu è n’inganneranu parechji, ¹² è per via di a crescita di l’iniquità, si rifriterà l’amore di parechji. ¹³ Ma à chì fermerà pacinziosu sin’à a fine serà salvu. ¹⁴ È stu vangelu di u regnu serà pruchjamatu in u mondu sanu, da testimunianza per tutte e nazione, è tandu venerà a fine. » ¹⁵ « Or quand’è vo viderete l’abuminazione di a disulazione — quella detta da u prufeta Daniellu — stabilita in u locu santu — ch’ellu capischi à chì leghje — ¹⁶ tandu, à chì serà in Ghjudea, ch’ellu fughji à via di e muntagne ¹⁷ à chì serà in terrazza, ch’ellu ùn falghi à ricute ciò chì hè in casa. ¹⁸ è à chì serà in u pratu, ch’ellu ùn volti à piglià u so mantellu. ¹⁹ Disgrazia à quelle chì seranu incinte è chì deranu à sughje in quelli ghjorni. ²⁰ Prichete puru d’ùn avè à fughje un ghjornu di tempurale o di sabbatu, ²¹ chì tandu serà una tribulazione maiò, cum’ellu ùn ne hè mai accadutu da u principiu di u mondu sin’à oghje, è ùn n’accaderà mai più. ²² È sì sti ghjorni ùn fussinu accurtati, nimu si salveria ma per via di i prascelti, sti ghjorni seranu accurtati. ²³ Allora, s’ellu vi dice qualchissia : ‘eccu, u Messia hè quì’, o ‘mì hè culà’, ùn lu cridite micca. ²⁴ Chì s’anu da sveglià falsi Messia è falsi prufeti, è feranu gran segni è miraculi, à tal puntu ch’elli inganneranu, s’elli puderanu, ancu i prascelti. ²⁵ Eccu, a v’aghju predetta. ²⁶ Dunque s’omu vi dice : ‘eccu lu in u disertu’, ùn ci currite. ‘Eccu lu in le rimesse’, ùn la cridite. ²⁷ Chì l’avvenimentu di u Figliolu di l’Omu serà cum’è l’accendita chì parte da livante è lucicheghja sin’à punante. ²⁸ Induve voglia ch’ellu sia u cadaveru, ci s’accuglieranu l’altori. » ²⁹ « Subitu dopu a tribulazione di quelli ghjorni,
s’abbughjerà u sole,
a luna ùn lucicherà più,
e stelle cascheranu da u celu,
è e putenze di i celi seranu cummosse.

³⁰ Tandu affaccherà in celu u segnudi u Figliolu di l’Omu ;tandu tutte e razze di a terra si mineranu in pettu è videranu u Figliolu di l’Omu chì vene annantu à i nivuli di u cele cù putenza è gloria maiò. ³¹ È manderà i so anghjuli, cù a trumbetta maiò, è, da i quattru venti, da un capu di i celi à l’altru, quelli accuglieranu i prascelti. » ³² « Impareti a parabula di a fica : quand’elle intenneriscenu e so branche è ch’elle crescenu e so fronde, sapeti chì l’istate hè vicinu ; ³³ cusì, ancu voi quand’è vo videreti tuttu què, sapiati chì u Figliolu di l’Omu hè vicinu à l’usciu. ³⁴ A vi dicu da veru, sta generazione quì ùn passerà innanzi chì tuttu què sia accadutu. ³⁵ U celu è a terra passeranu, e mio parolle ùn passeranu micca. » ³⁶ « Di u ghjornu è di l’ora nimu sà nunda, nè l’anghjuli di u celu, nè u Figliolu: solu u Babbu a sà. ³⁷ Cum’ella fù pè i ghjorni di Noè serà pè a venuta di u Figliolu di l’Omu. ³⁸ Cum’elli eranu in quelli ghjorni prima di u dilluviu, a ghjente manghjava, biia, si maritava è dava i soi in matrimoniu, sinu à ch’ellu entrassi Noè, ind’è l’arca. ³⁹ È nimu si n’accorse sin’à chì ellu venissi u dilluviu è purtà si à tutti; cusì serà pè a venuta di u Figliolu di l’Omu. ⁴⁰ Tandu, di dui chì seranu à l’ortu, unu serà pigliatu è l’altru lasciatu. ⁴¹ Di duie donne chì seranu à u mulinu, una serà pigliata è l’altra lasciata. ⁴² Dunque state svegli chì ùn sapete u ghjornu ch’ellu hà da vene u vostru signore. ⁴³ A capite chì u patrone di casa, s’ellu sapessi l’ora ch’ellu hà da vene u ladru, si tenerebbe svegliu è ùn si lasciarebbe viutà a casa. ⁴⁴ Dunque ancu voi tenite vi pronti chì u Figliolu di l’Omu venerà à l’ora ch’è vo ùn l’aspettate. » ⁴⁵ « Quale hè u servu fidatu è astutu chì u patrone hà messu sopr’à l’altri servi per purtà li da manghjà quand’ella hè l’ora ? ⁴⁶ Beatu issu servu s’è u patrone, quand’ellu volta, u trova chì face cusì. ⁴⁷ Da veru, a vi dicu, u patrone li darà u guvernu di tuttu ciò ch’ellu pussede. ⁴⁸ Ma s’ellu hè un gattivu servu s’hà da dì da sè à sè : ‘u patrone a si allonga’, ⁴⁹ mette à minà i so cumpagni, eppo manghja è beie cù i briaconi. ⁵⁰ Cusì po u patrone venerà u ghjornu chì u servu ùn la si aspetta è à un’ ora ch’ellu ùn cunnosce. ⁵¹ U sbrembarà è u tratterà cum’è tutti l’altri falsi. È tandu ci seranu i pianti è chirchenni. »