Luc 10
Les Évangiles en Corse

¹ Dopu u Signori scelsi altri è sittantadui omi è i mandedi à dui à dui davanti à ellu in ogni cità è locu duv’ellu avia da andà. ² È li dissi : « granu da sicà ci ni hè assai, ma i travagliadori sò pochi ; cusì dumandeti à u patroni di u granu ch’ellu mandi i travagliadori pà a sichera. ³ Andeti ! Vi mandu cum’è l’agnelli à mezu à i lupi. ⁴ Ùn purteti nè borsa, nè saccu, nè scarpi, è ùn saluteti à nimu par istrada. ⁵ È sì voi intriti ind’una casa, cuminceti par salutà dicendu : ‘paci à sta casa.’ ⁶ È s’ellu ci stà un omu di paci, u vostru salutu di paci li ghjuvarà ; sì di nò, u vostru salutu vi vultarà. ⁷ In quilla casa steti ci è magneti è biiti ciò ch’elli vi daranu ; chì u travagliadori hà drittu à a so paca. Ùn andeti da una casa à l’altra. ⁸ È si voi intriti ind’una cità è ch’elli vi accogliinu, magneti ciò chì vi sarà prupostu. ⁹ È risaneti i malati di a cità è diti li : ‘si hè avvicinatu da voi u Regnu di Diu.’ ¹⁰ È si voi intriti ind’una cità è ch’elli ùn vi accogliinu, andeti in li piazzi è diti : ¹¹ ‘scuzzulemu ancu a polvara di a vostra cità appiccicata à i nostri pedi, da renda vi la. Sappiati quantunqua ch’ellu si hè avvicinatu u Regnu di Diu.’ ¹² A vi dicu, quandu ellu sarà u ghjornu, sarà menu duru u casticu par Sodoma cà par quilla cità. » ¹³ « Guai à tè, o Corazin ! Guai à tè, o Betsaida ! Chì sì in Tiru è in Sidoni ci fussinu stati i miraculi ch’ellu ci hè statu ind’è voi, da un pezzu eranu cunvirtuti è oghji pusavanu ingutuppati di sacchi è cuparti à cennara. ¹⁴ Ma quand’ellu ghjugnarà u ghjornu, sarà menu duru u casticu par Tiru è par Sidoni cà par voi. ¹⁵ È tù, O Cafarnau,
soca credi d’avè da essa alzatu sinu à u celi ?
Insini à l’infernu falarè.

¹⁶ À chì vi stà à senta stà à senta à mè, è à chì vi ricusa ricusa à mè ; è à chì mi ricusa ricusa quillu chì mi hà mandatu. » ¹⁷ I sittantadui vultedinu alecri è dissinu : « o Signori, ancu i dimonii ci si sottumettinu in nomi toiu. » ¹⁸ È ellu li dissi : « vidiu à Satanassu chì cascava da u celi cum’è a saetta. ¹⁹ Eccu, vi aghju datu u puteri di calcicà i sarpi è i scurpioni, è tutta a putenza di u numicu, è nulla vi farà nisun mali. ²⁰ Ma ùn vi ralicreti di ch’elli vi si sottumettinu i spiriti gattivi, ralicreti vi ch’elli sianu scritti in li celi i vostri nomi. » ²¹ È à quellu mumentu, u Spiritu Santu l’impiì di gioia, è ellu dissi : « o Bà, Signori di u celi è di a tarra, ti ringraziu d’avè la piatta à i savii è à i struitonu, è d’avè la palesa à i zitelli. Iè,o Bà, cusì fù u to vulè. ²² Tuttu mi hè statu tramandatu da u me Babbu, è nimu sà qual’ellu hè u Figliolu, for di u Babbu, nè qual’ellu hè u Babbu, for di u Figliolu è di quillu à quali u Figliolu a palesa. » ²³ È vultatu versi i discepuli dissi à elli soli : « biati l’ochji chì vedinu ciò chì voi videti voi ! ²⁴ Chì, a vi dicu, parechji prufeti è rè anu bramatu di veda i cosi chì voi videti, ma ùn l’anu visti, è di senta i cosi chì voi sintiti, ma ùn l’anu intesi. » ²⁵ È un duttori di a Legi s’arrizzedi è, par metta lu à u provu, dissi : « o sgiò Maestru, chì aghju da fà par riceva a vita eterna ? » ²⁶ È Ghjesù li dissi : « chì ci hè di scrittuin la Legi ? Cumu a leghji ? » ²⁷ È quillu rispundì : « tinarè caru u to Signori cù tuttu u to cori, tutta a to anima, tutta a to forza, è tutta a to menti, è tinarè caru u to prossimu quant’è tù teni caru à tè » ²⁸ È Ghjesù dissi : « ai rispostu ghjustu ; fà cusì è sarè vivu. » ²⁹ Ma quillu, chì vulia avè a raghjoni, dissi à Ghjesù : « è quali saria u me prossimu ? » ³⁰ È Ghjesù rispundì : « falava unu da Ghjerusalemi à Ghjericcò, è li casconu i latri chì u spugliedinu, u tribbiedinu è si ni andedinu lascendu lu mezu mortu. ³¹ Casca ch’ellu falava un sacerdoti par quilla strada, u vidi è passedi da l’altru tagliu di a strada. ³² È cusì feci ancu un levita : ghjunsi à u locu duv’ellu era, u vidi è passedi da l’altru tagliu di a strada. ³³ Ma un Samaritanu chì era par viaghju li ghjunsi à cantu, u vidi, è ni fù cummossu. ³⁴ Li si avvicinedi, li missi l’oliu è u vinu nantu à i firiti, è i fascedi. U feci coglia à cavallu à u sumeri, u purtedi ind’una ustaria è u curedi. ³⁵ È u ghjornu dopu, caccedi dui pezzi d’arghjentu, i dedi à l’ustariaghju è li dissi ‘cura lu, è ciò chì tù avarè spesu di di più par ellu, à u vultà u ti pacaraghju.’ ³⁶ Quali di issi trè ti pari d’essa u prossimu di quillu chì avia scontru i latri ? » ³⁷ È u duttori di a Legi rispundì : « quillu chì li hà fattu u bè. » È Ghjesù li dissi : « vai è fà cum’ed ellu. » ³⁸ È fendu strada cù i discipuli ghjunsi ind’un paesi, è l’accolsi una donna chì si chjamava Marta. ³⁹ È Marta avia una surella chì si chjamava Maria. Quilla, pusata à i pedi di u Signori, stava a senta a so parolla. ⁴⁰ È Marta dava capu à tutti i faccendi di casa ; ghjunsi è dissi : « o Signori, ùn ti faci nulla chì me surella m’abbii lasciata sola à dà capu à tuttu ? Dì li ch’ella m’aiuti. » ⁴¹ È u Signori li rispundì : « aiò, o Marta, t’affanni è brioni par una cosa è par l’altra, ⁴² ma a cosa di primura hè una è basta : Maria hà sceltu a parti bona, chì ùn li sarà cacciata. »