Matthieu 10.17
Les Évangiles en Corse

¹ È chjamendu i so dodeci discepuli, Ghjesù li dete auturità annant’à i spiriti impuri, per ch’elli i caccessinu fora è ch’elli guarissinu ogni malatia è ogni pena. ² Eccu i nomi di i dodeci apostuli : primu Simone, chì hè chjamatu Petru, è Andria u fratellu, è Ghjacumu di Zebedeu, è Ghjuvanni u fratellu, ³ Filippu è Bartulumeu, Tumasgiu è Matteu u publicanu, Ghjacumu d’Alfeu, è Taddeu, ⁴ Simone di u partitu zelotu è Ghjuda l’Iscariotu, quellu chì, da dopu, u tradì. ⁵ Sti dodeci, Ghjesù i mandò cumandendu li cusì : « Ùn pigliate e strade di l’altre nazione, è ùn entrate in nissuna cità samaritana. ⁶ Andate piuttostu ver di e pecure perse di a casa d’Israele. ⁷ Per istrada, pruchjamate chì u regnu di i celi s’hè avvicinatu. ⁸ Guarite à chì hè debbule, svegliate i morti, purificate i leprosi, cacciate fora i demonii. Avete ricevutu di rigalu, date di rigalu. ⁹ Ùn tenite oru, nè argentu, nè soldu in e vostre cinte, ¹⁰ nè brisacca per u viaghju, nè dui mantelli, nè scarpi, nè bastone ; à chì travaglia hè degnu di u so pane. ¹¹ Quand’è vo entrate in un paese o una cità, guardate s’ellu ci hè un omu degnu, è state in casa soia sin’à u parte. ¹² À l’entre in quella casa, salutate la, ¹³ è sì sta casa ne hè degna, ch’ella ci falghi a vostra pace. Ma s’ella ùn ne hè degna, ùn li date a vostra pace. ¹⁴ È à chì ùn vi accuglierà nè vulerà sente e vostre parolle, surtite da sta casa o da sta cità è scuzzulate a polvera da i vostri pedi. ¹⁵ A vi dicu da veru, u ghjornu di u ghjudicamentu, i lochi di Sodoma è Gomorra averanu sorte più dolce chè sta cità. » ¹⁶ « Eccu chì eu vi mandu cum’è pecure trà i lupi ; siate dunque astuti cum’è i sarpi è nucenti cum’è e culombe. ¹⁷ Guardate vi da a ghjente, chì vi metteranu in manu à i ghjudici, è vi piglieranu à staffilate in e so sinagoghe, ¹⁸ è serete purtati davant’à guvernatori è rè, per via di mè, è serete testimoni davanti à elli elli è davanti à l’altre Nazione. ¹⁹ È quand’elli vi ci purteranu, ùn v’impenserite di sapè cum’è vo parlarete, è di chene, chì ciò chè vo avete da dì vi serà datu in quellu mumentu ; ²⁰ chì quelli chì parlanu ùn site micca voi, ma hè u Spiritu di u vostru Babbu chì parla in voi. ²¹ Un fratellu derà u fratellu da ch’ellu sia tombu, è un babbu u figliolu ; è i figlioli si rivulteranu contru à i genitori è faranu ch’elli morganu, ²² è tutti vi purteranu odiu per via di u mo nome. Ma quellu chì sterà fermu sin’à a fine, quellu serà salvu. ²³ Quand’è vo serete perseguitati in sta cità, fughjite à via di una antra, chì a vi dicu da veru : ùn averete compiu di girà e cità d’Israele prima ch’ellu venga u Figliolu di l’Omu.

²⁴ « Un discepule ùn hè micca più chè u maestru, nè un servu più chè u patrone. ²⁵ À u discepule, li basta à diventà cum’è u maestru, è à u servu cum’è u patrone. S’ellu hè statu chjamatu Belzebù u patrone di a casa, ancu peghju accaderà à quelli di a so casa. » ²⁶ « Dunque, à quelli ùn li temite, chì ùn ci hè nunda piattu chì ùn serà scupertu, nunda sicretu chì ùn serà cunnisciutu. ²⁷ Ciò ch’eu vi dicu à u bughju, dite la in pienu lume, è ciò chè vo sentite à l’arechja, mughjate la da nantu à i tetti. ²⁸ È ùn temite nunda da quelli chì ponu tumbà a persona ma ùn ponu tumbà l’anima ; temite piuttostu quellu chì pò fà perde anima è corpu in u focu eternu. ²⁹ Ùn si vendenu duie passule per un soldu ? Eppuru ùn ne casca mancu una in terra ch’ellu ùn voglia u vostru babbu. ³⁰ È i capelli chì voi avete in capu sò conti tutti. ³¹ Dunque ùn temite micca : site più di primura voi chè una banda di passule. » ³² « Dunque, à chì hà da piglià a mo pretesa davant’à l’omi, ancu eu piglieraghju a so pretesa davant’à u mo Babbu chì hè in i celi. ³³ È à chì mi rinicherà davant’à l’omi, u rinicheraghju ancu eu davant’à u mo Babbu chì hè in i celi. » ³⁴ « Ùn pensate micca ch’eu sia venutu à purtà a pace annantu à a terra. Ùn sò micca venutu à purtà a pace ma a spada, ³⁵ chì sò venutu
à spiccà l’omu da u babbu
è a figliola da a mamma
è a nora da a socera, ³⁶ è i nemichi di l’omu sò quelli di a so casa.’

³⁷ À chì tene caru u babbu è a mamma più chè à mè, ùn hè degnu di mè, è à chì tene caru u figliolu o a figliola più chè à mè, ùn hè degnu di mè, ³⁸ À chì ùn piglia a so croce è mi seguita, ùn hè degnu di mè. ³⁹ À chì hà trovu a so vita, a perderà, è à chì hà persu a so vita per via di mè, a truverà. » ⁴⁰ « À chì vi riceve riceve à mè, è à chì mi riceve riceve quellu chì m’hà mandatu. ⁴¹ À chì riceve un prufeta da prufeta, riceverà una paga di prufeta, è à chì riceve un ghjustu da ghjustu, li venerà una paga di ghjustu, ⁴² è à chì derà da beie puru un bichjere d’acqua fresca à unu solu di sti chjuchi, per via ch’ellu hè discepule, a vi dicu da veru : ùn perderà micca a so paga. »