Jean 1.37
Les Évangiles en Corse

¹ À principiu ci era a Parola, è a Parola era à cantu à Diu, è a Parola era Diu. ² Edda à principiu era à cantu à Diu. ³ Tuttu si feci par via d’edda, è nudda di ciò chì hè statu fattu si feci senza edda. ⁴ In edda era a vita, è a vita era a luci di l’omini ⁵ È a luci luccicheghja in la bughjura, è u bughju ùn li feci locu.

⁶ Ci fù un omu, mandatu da Diu, si chjamaia Ghjuvanni. ⁷ Ghjunsi com’è tistimoniu, da tistimunià pà a luci, chì tutti cridissini par via d’eddu. ⁸ Eddu a luci ùn era, ma vensi à tistimunià pà a luci. ⁹ Era a luci a vera chì, vinindu in lu mondu, allumineghja ogni omu. ¹⁰ Era in u mondu, è u mondu fù par via d’edda, è u mondu ùn la cunnisciti. ¹¹ Vensi in li so lochi è i soii ùn li fecini locu. ¹² À tutti quiddi chì a ricivitini, li deti u puteri di divintà fiddoli di Diu, à quiddi chì credini in lu so nomu, ¹³ è chì ùn sò micca nati da u sangui, nè da u vulè di a carri, nè da u vulè di l’omu, ma da Diu.

¹⁴ È a parola divintò carri è frà noi alzò a so tenda, è emu vistu a so gloria, com’è a gloria di u Fiddolu unicu di u Babbu, pienu di grazia è di virità. ¹⁵ Ghjuvanni li faci da tistimoniu, briona è dici : « eccu lu, quiddu di quali aghju dittu : ‘quiddu chì veni dopu à mè, mi hè passatu davanti chì prima cà mè era.’ » ¹⁶ Chì da a so piinezza emu avutu calcosa noi tutti, grazia è po grazia. ¹⁷ Parchì a Legi fù data da Musè, a grazia è a virità vensini da Ghjesucristu. ¹⁸ À Diu, nimu l’hà vistu mai ; Ma Diu Fiddolu unicu, chì hè in senu à u Babbu, u ci hà fattu cunnoscia. ¹⁹ Ed eccu a tistimunianza di Ghjuvanni, quandu i Ghjudei li mandetini da Ghjerusalema preti è Leviti par dumandà li : « Tù, quali sè ? » ²⁰ Accittò è ùn li ricusò a risposta, è dissi : « Eiu ùn socu micca u Missia. » ²¹ È li dumandetini : « allora quali sè ? Alia ? » Eddu dissi : « innò. » « Sè un Prufeta ? » È risposi : « innò. » ²² Tandu li dissini : « quali sè ? Chì noi diami una risposta à quiddi chì ci ani mandatu. Tù, chì dici di tè ? » ²³ Ghjuvanni dissi :
« Eiu,socu a boci di quiddu chì briona in lu disertu :
Apprunteti a strada di u Signori,

com’eddu dissi u Prufeta Isaia. » ²⁴ I mandataghji erani ghjenti di i Farusei. ²⁵ Li faciani dumandi è diciani : « è chì battizi, sì tù ùn sè nè u Missia, nè Alia, nè u Prufeta ? » ²⁶ Ghjuvanni li risposi è dissi : « eiu battizu in l’acqua ; ma in mezu à voi stà quiddu chì voi ùn cunnisciti, ²⁷ quiddu veni dopu à mè, ed eiu ùn socu degnu di disciodda li i currighjini di i sanduli. » ²⁸ Issi fatti stalvonu in Betania, da Ghjurdanu in dà, duv’è Ghjuvanni battizaia. ²⁹ U ghjornu dopu, visti à Ghjesù chì vinia à truvà lu, è dissi ; « eccu l’agneddu di Diu chì caccia i piccati di u mondu. ³⁰ Hè d’eddu ch’e’ aghju dittu : ‘quiddu chì veni dopu à mè mi hè passatu davanti, chì prima cà mè era.’ ³¹ Ed eiu mancu u cunnisciu, ma socu vinutu, eiu chì battizu cù l’acqua, da ch’eddu venghi palesu à Israela. » ³² È Ghjuvanni feci issa tistimunianza : « aghju vistu u Spiritu chì falaia da u celi com’è una culomba è chì li staia sopra. ³³ Ed eiu mancu u cunnisciu, ma quiddu chì mi hà mandatu à battizà cù l’acqua mi dissi : ‘quiddu chì tù vidarè chì u Spiritu li fala sopra è ci stà, hè eddu chì battiza in lu Spiritu Santu.’ ³⁴ Ed eiu aghju vistu è purtatu a tistimunianza chì quistu hè u Fiddolu di Diu. » ³⁵ U ghjornu dopu, Ghjuvanni era dinò quandì dà cù dui di i so discipuli ³⁶ è, fighjulendu à Ghjesù chì francaia, dissi : « eccu l’Agneddu di Diu. » ³⁷ È i dui discipuli u intesini è suvitetini à Ghjesù. ³⁸ Ghjesù si vultò, i visti chì u suvitaiani è li dissi : « chì circheti ?  » Ed eddi li risposini : « Rabbì — ciò chì si traduci ‘o Maestru’ — induva stai di casa ? » ³⁹ Li dissi : « viniti chì vidareti. » Andetini,viditini duv’eddu staia, è, quiddu ghjornu,stetini cun eddu ; erani quattru ori dopu meziornu. ⁴⁰ Andria, u frateddu di Simon Petru, era unu di i dui chì aiani intesu à Ghjuvanni è chì aiani suvitatu à Ghjesù. ⁴¹ Infattò prima à Simonu u frateddu è li dissi : « emu trovu u Missia. » — ciò chì si traduci ‘u Cristu » — ⁴² è u purteti ind’è Ghjesù ; Ghjesù u fighjulò è dissi : « tù sè Simonu, u fiddolu di Ghjuvanni, sarè chjamatu Cheffas », — ciò chì si traduci ‘Petru’ —. ⁴³ U ghjornu dopu Ghjesù volsi andà in Galilea, infattò à Filippu è li dissi : « suveta mi. » ⁴⁴ Filippu era di Betsaida, a cità d’Andria è di Petru. ⁴⁵ È Filippu andeti à truvà à Natanaela è li dissi : « emu trovu quiddu chì hè mintuvatu in la Legi di Musè è di i i Prufeta, hè Ghjesù, u fiddolu di Ghjaseppu, di Nazarè. » ⁴⁶ È Natanaela li risposi : « È soca da Nazarè pò escia calcosa di bonu ? » È Filippu li dissi : « veni chì vidarè. » ⁴⁷ Ghjesù visti à Natanaela chì vinia à truvà lu è dissi d’eddu : « eccu da veru un Israelatu senza falsità micca. » ⁴⁸ È Natanaela li dissi : « è da induva po mi cunnosci ? » Ghjesù li risposi è dissi : « nanzi chì Filippu ti chjamessi, quand’ì tù eri sottu à a fica, t’aghju vistu. » ⁴⁹ È Natanaela li risposi : « Rabbì, tù sè u Fiddolu di Diu, tù sè u Rè d’Israela. » ⁵⁰ Ghjesù risposi è li dissi : « parch’e’ ti aghju dittu ch’e’ t’aviu vistu sottu à a fica, tù credi ? Ai da veda altru cà cusì !  » ⁵¹ È li dissi : « a vi dicu da veru, eti da veda u celi apartu è l’Agnuli di Diu chì coddani è chì falani sopra à u Fiddolu di l’Omu. »