Matthieu 8
Les Évangiles en Corse

Ghjesù guarisce un leprosu

1 Ghjesù era falatu da a muntagna è eranu una mansa di ghjente chì andavanu cun ellu.
2 Ed eccuti ch’ellu affacca un liparosu, è li si indinochja davanti dicendu : « o Signore, s’è tù voli, mi poi purificà. »
3 Ghjesù stende a manu, u tocca è dice : « iè chì vogliu, purificatu ch’è tù sia » è quellu subitu subitu hè purificatu da a lepra.
4 Tandu Ghjesù li dice : « fà casu d’ ùn parlà ne à nimu, ma vai è fà ti vede da u prete è presenta li u donu ch’ellu hà dettu Musè, ch’ellu ghjovi di prova à tutti. »

Ghjesù guarisce u servu di un centurione
di l’armata rumana

5 Entrutu Ghjesù in Cafarnau, li s’affacca un centurione chì li chede aiutu, è dice :
6 « o Signore, ci aghju u mo servu stracquatu in lettu, hè paralizatu è strazia chì ùn ne pò più. »
7 Ghjesù li dice : « aghju da vene à guarì lu. »
8 U centurione risponde è dice : « o Signore, ùn sò degnu ch’è tù entri in casa mea, ma dì solu una parolla è u mo servu hà da esse guaritu.
9 Chì sò ancu eu un omu sottumessu à un putere, è sottu à mè aghju i suldati. À unu li dicu : ‘vai !’ è ellu và. À l’altru : ‘veni !’ è ellu vene. À u mo servu li dicu : ‘fà cusì !’ è ellu a face. »
10 Intesu isse parolle, Ghjesù si maraviglia è dice à l’altri chì eranu cun ellu : « a vi dicu da veru : tamanta fede ùn l’aghju trova indè nimu d’Israele.
11 È vi dicu chì parechji anu da vene da levante è punente è ch’elli s’anu da calà à tavulinu cù Abraamu, cù Isaccu è cù Ghjacobbu in u regnu di i celi.
12 Invece quelli chì devianu stà in u regnu seranu lampati fora in a bughjura ; è ci seranu i pienti è i chirchenni. »
13 È po Ghjesù disse à u centurione : « vai, ch’ella ti sia fatta secondu a to fede. » È subitu tandu u servu fù guaritu.

Ghjesù guarisce parechje persone

14 Dopu Ghjesù entre in casa ind’è Petru. Vede a socera di quellu stracquata cù a freba.
15 Tocca a so manu è a freba sparisce ; tandu a donna s’arrizza è mette à serve lu.
16 Toccu sera, li purtonu parechje persone indemuniate. Cù a so parolla mandò via i spiriti è guarì tutti i malati.
17 Cusì fù rializata a parolla di Diu detta da u prufetu Isaia :
si hà pigliatu à dossu tutte e nostre debulezze
è s’hà messu à collu tutti i nostri mali.’

Ghjesù risponde à quelli chì u vulianu seguità

18 Videndu si una grande folla in giru, Ghjesù cumandò d’andà da culandi à u lavu.
19 S’avvicina un maestru di a Lege è dice à Ghjesù : « o Maestru, aghju da vene cù tè duv’è voglia ch’è tù vachi. »
20 È Ghjesù dice : « e volpe anu e so tane è l’acelli di u celu anu i so nidi, ma u Figliolu di l’Omu ùn hà locu da ripone u capu. »
21 Un antru di i discepuli li disse : « o Sgiò Maestru, lascia ch’È vachi prima à interrà à babbu. »
22 Ghjesù li dice : « veni cù mè è lascia i morti interrà i morti. »

Ghjesù calma a timpesta

23 S’era imbarcatu cù i so discepuli chì andavanu cun ellu.
24 Ed eccu ch’ellu ci fù in mare tamanta timpesta è a barca fù fasciata da i marosuli, ma ellu durmia.
25 L’altri s’avvicinanu, u discetanu è dicenu : « o Signore, salva ci, chì simu persi. »
26 Li dice : « chì hè sta paura, o ghjente di poca fede ? » Tandu s’arrizza, minaccia i venti è u mare, è vene a calma tamanta.
27 Tandu, l’omi si ne maraviglianu è dicenu : « chì omu serà questu, chì ancu i venti è u mare u stanu à sente? »

Ghjesù guarisce dui indemuniati in Gadarà

28 Ghjuntu ch’ellu fù da mare in là, in i lochi di i Gadaresi, l’affacconu dui indemuniati isciuti da e tombe ; da tantu ch’elli eranu periculosi, nimu pudia più passà pè quella strada.
29 Ed eccu chì elli mettenu à mughjà : « chì ci hè, da noi à tè, o figliolu di Diu, serai ghjuntu à strazià ci prima di l’ora ? »
30 È ci era, luntanu, una bella banda di porchi chì pascianu.
31 I demonii pricuravanu à Ghjesù : « s’è tù ci scacci, metti ci ind’è issa banda di i porchi. »
32 Ghjesù li dice : « andate. » Tandu sortenu da l’omi è entrenu in i porchi. Ed eccu a banda sana chì si lampa in mare da l’elpa, è morenu tutti ind’è l’acqua.
33 I purcaghji eranu scappati è andati à fà sapè tuttu pè a cità, è cuntetinu ancu quella di l’indemuniati.
34 Ed eccu chì a cità sana esce à truvà à Ghjesù ; è vistu lu, li dumandanu d’esce da i so cunfini.

Matthieu 8 Les Évangiles en Corse