Luc 18
Les Évangiles en Corse

¹ È par fà vede ch’ellu li ci vulia à pricà sempre senza scuraggì si mai, li cuntò una parabula. ² Disse cusì : « ind’ una cità, ci era un ghjudice chì ùn avia nè timenza di Diu nè rispettu di l’omu. ³ È ci era, in quella cità, una veduva chì andava à truvallu è dicia : ‘fà mi ghjustizia contru à u me avversariu.’ ⁴ È quellu, par un tempu, ùn li dete capu. Ma dopu, disse da sè à sè : ‘puru ch’e’ ùn abbia nè timenza di Diu nè rispettu di l’omu, ⁵ li vogliu fà ghjustizia par cacciallami da l’arechje chì mi dà fastidiu issa veduva.’  » ⁶ È disse u Signore : « sintite ciò ch’ellu dice u ghjudice inghjustu ; ⁷ È Diu ùn faria po a ghjustizia à quelli ch’ellu hà sceltu è chì u chjamanu di notte è di ghjornu, l’avarà da fà aspittà ? ⁸ A vi dicu, li farà a ghjustizia bellu lestru, ma quand’ellu ghjunghjarà u Figliolu di l’Omu, a truvarà a fede annantu à a tarra ? » ⁹ È à certi chì eranu parsuasi d’esse ghjusti è disprizzavanu à l’altri, li dete issa parabula : ¹⁰ « dui omi culledenu à u tempiu à pricà, unu era Faruseu è l’altru publicanu. ¹¹ U Faruseu, arrittu, pricava cusì in ellu stessu : ‘o Diu, ti ringraziu d’ùn esse, eiu, cum’è l’altri omi, latri, inghjusti, adulteri, o puru cum’è stu paccittore ; ¹² facciu u dighjunu duie volte à sittimana, dò u decimu di tuttu ciò ch’e’ vinciu.’ ¹³ È u publicanu si tinia luntanu, ùn vulia mancu alzà l’ochji ver di u celu, ma si minava in pettu, dicendu : ‘o Diu, succorri mi, à mè u piccatore.’ ¹⁴ A vi dicu, quessu hè falatu ghjustificatu in casa soia è l’altru micca. Chì à chì si inalza sarà abbassatu è à chì si abbassa sarà inalzatu. » ¹⁵ È a ghjente li purtava e criature da ch’ellu e tuccassi. È videnduli, i discepuli i litticavanu. ¹⁶ Ma Ghjesù i fece vene, è disse : « lasciate ch’elli venganu duv’è mè i zitillucci è ùn li parate chì u Regnu di Diu hè da quelli chì li s’assumiglianu. ¹⁷ A vi dicu da veru, à chì ùn riceve u Regnu di Diu cum’è un zitillucciu, ch’ellu ùn ci entri. » ¹⁸ Un principale li fece una dumanda è disse : « o Maestru cusì bonu, chì ci vole ch’e’ fia par riceve a vita eterna in lascita ? » ¹⁹ È Ghjesù li disse : « comu hè chì tù mi chjami bonu ? Bonu hè Diu è basta ! ²⁰ I cumandi i cunnosci : chì tù ùn sii adulteru, chì tù ùn tombi, chì tù un furi, chì tù ùn sii falsu tistimone, chì tù onori à babbitu è à mammata. » ²¹ È quellu disse : « tutti issi cumandi, l’aghju tinuti da chjucu sinu ad oghje. » ²² Sintendu cusì, Ghjesù li disse : « ti manca sempre una cosa : Tutta a to robba, vendi la è sparti trà i povari, è avarè un tisoru in celu, poi veni è suveta à mè. » ²³ Intesu cusì, quellu fù afflittu chì era riccu assai.

²⁴ Videndulu cusì, Ghjesù li disse : « cusì difficiule ch’ellu entri, à chì pussede ricchezze, in lu Regnu di Diu ! ²⁵ Chì hè più faciule ch’ellu entri un camellu pà a cruna di l’acu cà di pudè entre un irriccu in lu Regnu di Diu. » ²⁶ Quelli chì stavanu à sente li dissenu : « è quale pò esse salvatu ? » ²⁷ È ellu disse : « ciò ch’elli ùn ponu fà l’omi, Diu a pò fà. » ²⁸ È Petru disse : « mì, noi avemu lasciatu tuttu u nostru è t’avemu suvitatu. » ²⁹ È ellu li disse : « a vi dicu da veru, à chì si hà lasciatu o casa, o moglia o fratelli o parenti o zitelli par via di u Regnu di Diu, ³⁰ quellu sì chì ricivarà assai di di più indì issu tempu è a vita eterna in lu seculu chì vene. » ³¹ Ghjesù pigliò i dodici cùn ellu è li disse : « eccu, cullemu in Ghjerusaleme, è tuttu ciò chì hè statu scrittu da i prufeti pà u Figliolu di l’Omu hà da vene cumpiitu. ³² Iè, sarà datu in manu à i stranieri, sarà messu à a risa, sarà insultatu, li stupparanu addossu ³³ è dopu d’avellu tribbiu di frusta, u tumbaranu, è u terzu ghjornu s’arrizzarà. » ³⁴ Ed elli ùn capianu micca, a parolla li firmava piatta è mancu sapianu di chene si trattassi. ³⁵ Mentre ch’ellu s’avvicinava da Ghjericcò, ci era un cecu chì circatava, pusatu à tagliu di strada. ³⁶ Sintendu a ghjente chì passava, dumandete ciò chì ellu era. ³⁷ Li fù dettu ch’ellu passava Ghjesù di Nazarè. ³⁸ È briunete : « o Ghjesù, figliolu di Davide, abbii pietà di mè ! » ³⁹ È quelli chì viaghjavanu innanzu u litticavanu, par fà lu stà zittu, ma ellu briunava ancu di più : « Figliolu di Davide, abbii pietà di mè ! » ⁴⁰ È Ghjesù fece a piantata è cumandò ch’elli u li avvicinassinu, è quand’ellu fù vicinu, li dumandete : ⁴¹ « chì voli ch’e’ fia da tè ? » È quellu disse : « o Signore, ch’e’ ci vega dinò ! » ⁴² È Ghjesù li disse : « vedi ci dinò ! A to fede ti hà salvu. » ⁴³ È da u dettu à u fattu quellu ci vidì è u suvitede, glurifichendu à Diu. È tutta a ghjente, videndu issi fatti, fece loda à Diu.