Ezéchiel 21.32
Vulgate

¹ Et factus est sermo Domini ad me dicens ² Fili hominis, pone faciem tuam contra viam austri et stilla ad africum et propheta ad saltum agri meridiani ³ Et dices saltui meridiano Audi verbum Domini haec dicit Dominus Deus ecce ego succendam in te ignem et comburam in te omne lignum viride et omne lignum aridum non extinguetur flamma succensionis et comburetur in ea omnis facies ab austro usque ad aquilonem ⁴ et videbit universa caro quia ego Dominus succendi eam nec extinguetur ⁵ et dixi A a a Domine Deus ipsi dicunt de me Numquid non per parabolas loquitur iste ⁶ et factus est sermo Domini ad me dicens ⁷ fili hominis pone faciem tuam ad Hierusalem et stilla ad sanctuaria et propheta contra humum Israhel ⁸ et dices terrae Israhel haec dicit Dominus Deus ecce ego ad te et eiciam gladium meum de vagina sua et occidam in te iustum et impium ⁹ pro eo autem quod occidi in te iustum et impium idcirco egredietur gladius meus de vagina sua ad omnem carnem ab austro ad aquilonem ¹⁰ ut sciat omnis caro quia ego Dominus eduxi gladium meum de vagina sua inrevocabilem ¹¹ et tu fili hominis ingemesce in contritione lumborum et in amaritudinibus ingemesce coram eis ¹² cumque dixerint ad te quare tu gemis dices pro auditu quia venit et tabescet omne cor et dissolventur universae manus et infirmabitur omnis spiritus et per cuncta genua fluent aquae ecce venit et fiet ait Dominus Deus ¹³ et factus est sermo Domini ad me dicens ¹⁴ fili hominis propheta et dices haec dicit Dominus Deus loquere gladius gladius exacutus est et limatus ¹⁵ ut caedat victimas exacutus est ut splendeat limatus est qui moves sceptrum filii mei succidisti omne lignum ¹⁶ et dedi eum ad levigandum ut teneatur manu iste exacutus est gladius et iste limatus ut sit in manu interficientis ¹⁷ clama et ulula fili hominis quia hic factus est in populo meo hic in cunctis ducibus Israhel qui fugerant gladio traditi sunt cum populo meo idcirco plaude super femur ¹⁸ quia probatus est et hoc cum sceptrum subverterit et non erit dicit Dominus Deus ¹⁹ tu ergo fili hominis propheta et percute manu ad manum et duplicetur gladius ac triplicetur gladius interfectorum hic est gladius occisionis magnae qui obstupescere eos facit ²⁰ et corde tabescere et multiplicat ruinas in omnibus portis eorum dedi conturbationem gladii acuti et limati ad fulgendum amicti ad caedem ²¹ exacuere vade ad dextram sive ad sinistram quocumque faciei tuae est appetitus ²² quin et ego plaudam manu ad manum et implebo indignationem meam ego Dominus locutus sum ²³ et factus est sermo Domini ad me dicens ²⁴ et tu fili hominis pone tibi duas vias ut veniat gladius regis Babylonis de terra una egredientur ambo et manu capiet coniecturam in capite viae civitatis coniciet ²⁵ viam pones ut veniat gladius ad Rabbath filiorum Ammon et ad Iudam in Hierusalem munitissimam ²⁶ stetit enim rex Babylonis in bivio in capite duarum viarum divinationem quaerens commiscens sagittas interrogavit idola exta consuluit ²⁷ ad dextram eius facta est divinatio super Hierusalem ut ponat arietes ut aperiat os in caede ut elevet vocem in ululatu ut ponat arietes contra portas ut conportet aggerem ut aedificet munitiones ²⁸ eritque quasi consulens frustra oraculum in oculis eorum et sabbatorum otium imitans ipse autem recordabitur iniquitatis ad capiendum ²⁹ idcirco haec dicit Dominus Deus pro eo quod recordati estis iniquitatis vestrae et revelastis praevaricationes vestras et apparuerunt peccata vestra in omnibus cogitationibus vestris pro eo inquam quod recordati estis manu capiemini ³⁰ tu autem profane impie dux Israhel cuius venit dies in tempore iniquitatis praefinita ³¹ haec dicit Dominus Deus aufer cidarim tolle coronam nonne haec est quae humilem sublevavit et sublimem humiliavit ³² iniquitatem iniquitatem iniquitatem ponam eam et hoc nunc factum est donec veniret cuius est iudicium et tradam ei ³³ et tu fili hominis propheta et dic haec dicit Dominus Deus ad filios Ammon et ad obprobrium eorum et dices mucro mucro evaginate ad occidendum limate ut interficias et fulgeas ³⁴ cum tibi viderentur vana et divinarentur mendacia ut dareris super colla vulneratorum impiorum quorum venit dies in tempore iniquitatis praefinita ³⁵ revertere ad vaginam tuam in loco in quo creatus es in terra nativitatis tuae iudicabo te ³⁶ et effundam super te indignationem meam in igne furoris mei sufflabo in te daboque te in manus hominum insipientium et fabricantium interitum ³⁷ igni eris cibus sanguis tuus erit in medio terrae oblivioni traderis quia ego Dominus locutus sum