La Bible Vulgate

Chapitre 39 Chapitre 41

Incapacité de Job à répondre

¹ et adjecit Dominus et locutus est ad Job ² numquid qui contendit cum Deo tam facile conquiescit utique qui arguit Deum debet respondere ei. ³ respondens autem Job Domino dixit ⁴ qui leviter locutus sum respondere quid possum manum meam ponam super os meum ⁵ unum locutus sum quod utinam non dixissem et alterum quibus ultra non addam

Les animaux monstrueux

⁶ respondens autem Dominus Iob de turbine ait ⁷ accinge sicut vir lumbos tuos interrogabo te et indica mihi ⁸ numquid irritum facies iudicium meum et condemnabis me ut tu iustificeris ⁹ et si habes brachium sicut Deus et si voce simili tonas ¹⁰ circumda tibi decorem et in sublime erigere et esto gloriosus et speciosis induere vestibus ¹¹ disperge superbos furore tuo et respiciens omnem arrogantem humilia ¹² respice cunctos superbos et confunde eos et contere impios in loco suo ¹³ absconde eos in pulvere simul et facies eorum demerge in foveam ¹⁴ et ego confitebor quod salvare te possit dextera tua ¹⁵ ecce Behemoth quem feci tecum faenum quasi bos comedet ¹⁶ fortitudo eius in lumbis eius et virtus illius in umbilicis ventris eius ¹⁷ constringit caudam suam quasi cedrum nervi testiculorum eius perplexi sunt ¹⁸ ossa eius velut fistulae aeris cartilago illius quasi lamminae ferreae ¹⁹ ipse principium est viarum Dei qui fecit eum adplicabit gladium eius ²⁰ huic montes herbas ferunt omnes bestiae agri ludent ibi ²¹ sub umbra dormit in secreto calami et locis humentibus ²² protegunt umbrae umbram eius circumdabunt eum salices torrentis ²³ ecce absorbebit fluvium et non mirabitur habet fiduciam quod influat Iordanis in os eius ²⁴ in oculis eius quasi hamo capiet eum et in sudibus perforabit nares eius ²⁵ an extrahere poteris Leviathan hamo et fune ligabis linguam eius ²⁶ numquid pones circulum in naribus eius et armilla perforabis maxillam eius ²⁷ numquid multiplicabit ad te preces aut loquetur tibi mollia ²⁸ numquid feriet tecum pactum et accipies eum servum sempiternum ²⁹ numquid inludes ei quasi avi aut ligabis illum ancillis tuis ³⁰ concident eum amici divident illum negotiatores ³¹ numquid implebis sagenas pelle eius et gurgustium piscium capite illius ³² pone super eum manum tuam memento belli nec ultra addas loqui