La Bible Bible en Swahili de l’est

Chapitre 26 Chapitre 28

Conclusion de Job

¹ Kisha Ayubu akaendelea na mithali yake, na kusema,
² Kama aishivyo Mungu, aliyeniondolea haki yangu; Huyo Mwenyezi aliyeitesa nafsi yangu;
³ (Kwa kuwa uhai wangu ukali mzima ndani yangu, Na roho ya Mungu i katika pua yangu;)
⁴ Hakika midomo yangu haitanena yasiyo haki, Wala ulimi wangu hautatamka udanganyifu.
⁵ Hasha! Nisiwahesabie ninyi kuwa na haki; Hata nitakapokufa sitajiondolea uelekevu wangu.
⁶ Haki yangu naishika sana, wala sitaiacha; Moyo wangu hautanisuta wakati nikiwapo hai.
⁷ Adui yangu na awe kama huyo mwovu, Na mwenye kuondoka kinyume changu na awe kama asiye haki.
⁸ Kwani tumaini la mpotovu ni nini, ingawa ajipatia faida, Hapo Mungu amwondoleapo roho yake?
⁹ Je! Mungu atakisikia kilio chake, Taabu zitakapomfikilia?
¹⁰ Je! Atajifurahisha katika Mwenyezi, Na kumlingana Mungu nyakati zote?
¹¹ Nitawafundisha ninyi mambo ya mkono wa Mungu; Hayo yaliyo kwa Mwenyezi sitayaficha.
¹² Tazama, ninyi nyote mmeyaona wenyewe; Mbona basi mmebatilika kabisa?
¹³ Hii ndiyo sehemu ya mtu mwovu kwa Mungu, Na urithi wa hao waoneao, waupokeao kwa Mwenyezi.
¹⁴ Watoto wake wakiongezeka ni kwa upanga; Na wazao wake hawatashiba chakula.
¹⁵ Hao watakaosalia kwake watazikwa katika kufa, Wala wajane wake waliofiwa na waume hawataomboleza.
¹⁶ Ajapokusanya fedha kama mavumbi, Na kujifanyia mavazi kama udongo kwa wingi;
¹⁷ Yumkini kuyatengeza, lakini wenye haki watayavaa, Nao wasio na hatia watazigawanya hizo fedha.
¹⁸ Yeye hujenga nyumba yake kama mdudu, Na kama kibanda afanyacho mlinzi.
¹⁹ Yeye hujilaza hali ni tajiri, lakini ndio mwisho; Hufunua macho yake, naye hayuko.
²⁰ Vitisho vyampata kama maji mengi; Dhoruba humwiba usiku.
²¹ Upepo wa mashariki humchukua, naye huondoka; Na kumkumba atoke mahali pake.
²² Kwani Mungu atamtupia asimhurumie; Angependa kuukimbia mkono wake.
²³ Watu watampigia makofi, Na kumzomea atoke mahali pake.