La Bible Bible en Swahili de l’est

Chapitre 3 Chapitre 5

L’acquisition de la sagesse

¹ Wanangu, yasikilizeni mausia ya baba yenu, Tegeni masikio mpate kujua ufahamu.
² Kwa kuwa nawapa mafundisho mazuri; Msiiache sheria yangu.
³ Maana nalikuwa mwana kwa baba yangu, Mpole, mpenzi wa pekee wa mama yangu.
⁴ Naye akanifundisha, akaniambia, Moyo wako uyahifadhi maneno yangu; Shika amri zangu ukaishi.
⁵ Jipatie hekima, jipatie ufahamu; usiusahau; Wala usiyakatae maneno ya kinywa changu.
⁶ Usimwache, naye atakuhifadhi; Umpende, naye atakulinda.
⁷ Bora hekima, basi jipatie hekima; Naam, kwa mapato yako yote jipatie ufahamu.
⁸ Umtukuze, naye atakukuza; Atakupatia heshima, ukimkumbatia.
⁹ Atakupa neema kuwa kilemba kichwani; Na kukukirimia taji ya uzuri.
¹⁰ Mwanangu, sikiliza, na kuzipokea kauli zangu; Na miaka ya maisha yako itakuwa mingi.
¹¹ Nimekufundisha katika njia ya hekima; Nimekuongoza katika mapito ya unyofu.
¹² Uendapo, hatua zako hazitadhiikika, Wala ukipiga mbio hutajikwaa.
¹³ Mkamate sana elimu, usimwache aende zake; Mshike, maana yeye ni uzima wako.
¹⁴ Usiingie katika njia ya waovu, Wala usitembee katika njia ya wabaya.
¹⁵ Jiepushe nayo, usipite karibu nayo, Igeukie mbali, ukaende zako.
¹⁶ Maana hawalali isipokuwa wametenda madhara; Huondolewa usingizi, ikiwa hawakumwangusha mtu.
¹⁷ Maana wao hula mkate wa uovu, Nao hunywa divai ya jeuri.
¹⁸ Bali njia ya wenye haki ni kama nuru ing’aayo, Ikizidi kung’aa hata mchana mkamilifu.
¹⁹ Njia ya waovu ni kama giza; Hawajui ni kitu gani kiwakwazacho.
²⁰ Mwanangu, sikiliza maneno yangu; Tega sikio lako, uzisikie kauli zangu.
²¹ Zisiondoke machoni pako; Uzihifadhi ndani ya moyo wako.
²² Maana ni uhai kwa wale wazipatao, Na afya ya mwili wao wote.
²³ Linda moyo wako kuliko yote uyalindayo; Maana ndiko zitokako chemchemi za uzima.
²⁴ Kinywa cha ukaidi ukitenge nawe, Na midomo ya upotovu uiweke mbali nawe.
²⁵ Macho yako yatazame mbele, Na kope zako zitazame mbele yako sawasawa.
²⁶ Ulisawazishe pito la mguu wako, Na njia zako zote zithibitike;
²⁷ Usigeuke kwa kuume wala kwa kushoto; Ondoa mguu wako maovuni.