Jonas 2.4
Biblia Hebraica Stuttgartensia

Jonas dans le poisson

¹ (1.17) וַיְמַ֤ן יְהוָה֙ דָּ֣ג גָּדֹ֔ול לִבְלֹ֖עַ אֶת־יֹונָ֑ה וַיְהִ֤י יֹונָה֙ בִּמְעֵ֣י הַדָּ֔ג שְׁלֹשָׁ֥ה יָמִ֖ים וּשְׁלֹשָׁ֥ה לֵילֹֽות׃
Psaumes 130.1-130.2 Job 13.15 Esaïe 26.16 Jacques 5.13 Psaumes 91.15
² (2.1) וַיִּתְפַּלֵּ֣ל יֹונָ֔ה אֶל־יְהוָ֖ה אֱלֹהָ֑יו מִמְּעֵ֖י הַדָּגָֽה׃
Psaumes 120.1 Psaumes 18.4-18.6 Psaumes 34.6 Psaumes 65.2 Matthieu 12.40
³ (2.2) וַיֹּ֗אמֶר קָ֠רָאתִי מִצָּ֥רָה לִ֛י אֶל־יְהוָ֖ה וַֽיַּעֲנֵ֑נִי מִבֶּ֧טֶן שְׁאֹ֛ול שִׁוַּ֖עְתִּי שָׁמַ֥עְתָּ קֹולִֽי׃
Psaumes 42.7 Lamentations 3.54 Psaumes 69.1-69.2 Psaumes 69.14-69.15 Jonas 1.12-1.16
⁴ (2.3) וַתַּשְׁלִיכֵ֤נִי מְצוּלָה֙ בִּלְבַ֣ב יַמִּ֔ים וְנָהָ֖ר יְסֹבְבֵ֑נִי כָּל־מִשְׁבָּרֶ֥יךָ וְגַלֶּ֖יךָ עָלַ֥י עָבָֽרוּ׃
Psaumes 31.22 Psaumes 5.7 Esaïe 38.17 2 Chroniques 6.38 Jérémie 7.15
⁵ (2.4) וַאֲנִ֣י אָמַ֔רְתִּי נִגְרַ֖שְׁתִּי מִנֶּ֣גֶד עֵינֶ֑יךָ אַ֚ךְ אֹוסִ֣יף לְהַבִּ֔יט אֶל־הֵיכַ֖ל קָדְשֶֽׁךָ׃
Psaumes 69.1-69.2 Lamentations 3.54 Psaumes 40.2
⁶ (2.5) אֲפָפ֤וּנִי מַ֨יִם֙ עַד־נֶ֔פֶשׁ תְּהֹ֖ום יְסֹבְבֵ֑נִי ס֖וּף חָב֥וּשׁ לְרֹאשִֽׁי׃
Psaumes 30.3 Psaumes 16.10 Esaïe 38.17 Job 33.24 Psaumes 30.9
⁷ (2.6) לְקִצְבֵ֤י הָרִים֙ יָרַ֔דְתִּי הָאָ֛רֶץ בְּרִחֶ֥יהָ בַעֲדִ֖י לְעֹולָ֑ם וַתַּ֧עַל מִשַּׁ֛חַת חַיַּ֖י יְהוָ֥ה אֱלֹהָֽי׃
Psaumes 11.4 Psaumes 18.6 2 Chroniques 30.27 Psaumes 143.5 Habakuk 2.20
⁸ (2.7) בְּהִתְעַטֵּ֤ף עָלַי֙ נַפְשִׁ֔י אֶת־יְהוָ֖ה זָכָ֑רְתִּי וַתָּבֹ֤וא אֵלֶ֨יךָ֙ תְּפִלָּתִ֔י אֶל־הֵיכַ֖ל קָדְשֶֽׁךָ׃
Psaumes 31.6 2 Rois 17.15 Jérémie 2.13 Jérémie 10.8 1 Samuel 12.21
⁹ (2.8) מְשַׁמְּרִ֖ים הַבְלֵי־שָׁ֑וְא חַסְדָּ֖ם יַעֲזֹֽבוּ׃
Psaumes 50.14 Psaumes 3.8 Ecclésiaste 5.4-5.5 Osée 14.2 Psaumes 50.23
¹⁰ (2.9) וַאֲנִ֗י בְּקֹ֤ול תֹּודָה֙ אֶזְבְּחָה־לָּ֔ךְ אֲשֶׁ֥ר נָדַ֖רְתִּי אֲשַׁלֵּ֑מָה יְשׁוּעָ֖תָה לַיהוָֽה׃ ס
Matthieu 8.8-8.9 Jonas 1.17 Psaumes 33.9 Genèse 1.11 Genèse 1.9
¹¹ (2.10) וַיֹּ֥אמֶר יְהוָ֖ה לַדָּ֑ג וַיָּקֵ֥א אֶת־יֹונָ֖ה אֶל־הַיַּבָּשָֽׁה׃ פ