Job 14
Biblia Hebraica Stuttgartensia

¹ אָ֭דָם יְל֣וּד אִשָּׁ֑ה קְצַ֥ר יָ֝מִ֗ים וּֽשְׂבַֽע־רֹֽגֶז׃ Job 5.7 Ecclésiaste 2.23 Job 25.4 Psaumes 51.5 Matthieu 11.11
² כְּצִ֣יץ יָ֭צָא וַיִּמָּ֑ל וַיִּבְרַ֥ח כַּ֝צֵּ֗ל וְלֹ֣א יַעֲמֹֽוד׃ Job 8.9 1 Pierre 1.24 Esaïe 40.6-40.8 Psaumes 103.15-103.16 1 Chroniques 29.15
³ אַף־עַל־זֶ֭ה פָּקַ֣חְתָּ עֵינֶ֑ךָ וְאֹ֘תִ֤י תָבִ֖יא בְמִשְׁפָּ֣ט עִמָּֽךְ׃ Psaumes 143.2 Psaumes 144.3 Psaumes 8.4 Job 13.27 Job 9.32
⁴ מִֽי־יִתֵּ֣ן טָ֭הֹור מִטָּמֵ֗א לֹ֣א אֶחָֽד׃ Jean 3.6 Job 15.14 Psaumes 51.5 Ephésiens 2.3 Romains 5.12
⁵ אִ֥ם חֲרוּצִ֨ים׀ יָמָ֗יו מִֽסְפַּר־חֳדָשָׁ֥יו אִתָּ֑ךְ חֻקָּ֥יו עָ֝שִׂ֗יתָ וְלֹ֣א יַעֲבֹֽור׃ Psaumes 39.4 Job 21.21 Actes 17.26 Daniel 4.35 Apocalypse 3.7
⁶ שְׁעֵ֣ה מֵעָלָ֣יו וְיֶחְדָּ֑ל עַד־יִ֝רְצֶ֗ה כְּשָׂכִ֥יר יֹומֹֽו׃ Job 7.19 Job 7.1-7.2 Psaumes 39.13 Job 7.16 Job 10.20
⁷ כִּ֤י יֵ֥שׁ לָעֵ֗ץ תִּ֫קְוָ֥ה אִֽם־יִ֭כָּרֵת וְעֹ֣וד יַחֲלִ֑יף וְ֝יֹֽנַקְתֹּ֗ו לֹ֣א תֶחְדָּֽל׃ Esaïe 27.6 Job 19.10 Esaïe 11.1 Daniel 4.15 Job 14.14
⁸ אִם־יַזְקִ֣ין בָּאָ֣רֶץ שָׁרְשֹׁ֑ו וּ֝בֶעָפָ֗ר יָמ֥וּת גִּזְעֹֽו׃ Jean 12.24 Esaïe 26.19 1 Corinthiens 15.36
⁹ מֵרֵ֣יחַ מַ֣יִם יַפְרִ֑חַ וְעָשָׂ֖ה קָצִ֣יר כְּמֹו־נָֽטַע׃ Romains 11.17-11.24 Ezéchiel 17.22-17.24 Ezéchiel 19.10 Ezéchiel 17.3-17.10
¹⁰ וְגֶ֣בֶר יָ֭מוּת וַֽיֶּחֱלָ֑שׁ וַיִּגְוַ֖ע אָדָ֣ם וְאַיֹּֽו׃ Job 14.12 Job 7.7-7.10 Job 17.13-17.16 Proverbes 14.32 Job 10.18
¹¹ אָֽזְלוּ־מַ֭יִם מִנִּי־יָ֑ם וְ֝נָהָ֗ר יֶחֱרַ֥ב וְיָבֵֽשׁ׃ Esaïe 19.5 Jérémie 15.18 Job 6.15-6.18
¹² וְאִ֥ישׁ שָׁכַ֗ב וְֽלֹא־יָ֫ק֥וּם עַד־בִּלְתִּ֣י שָׁ֭מַיִם לֹ֣א יָקִ֑יצוּ וְלֹֽא־יֵ֝עֹ֗רוּ מִשְּׁנָתָֽם׃ Job 10.21-10.22 Apocalypse 21.1 Actes 3.21 Job 3.13 Apocalypse 20.11
¹³ מִ֤י יִתֵּ֨ן׀ בִּשְׁאֹ֬ול תַּצְפִּנֵ֗נִי תַּ֭סְתִּירֵנִי עַד־שׁ֣וּב אַפֶּ֑ךָ תָּ֤שִֽׁית לִ֖י חֹ֣ק וְתִזְכְּרֵֽנִי׃ Esaïe 26.20-26.21 Marc 13.32 Actes 17.31 Esaïe 12.1 Luc 23.42
¹⁴ אִם־יָמ֥וּת גֶּ֗בֶר הֲיִ֫חְיֶ֥ה כָּל־יְמֵ֣י צְבָאִ֣י אֲיַחֵ֑ל עַד־בֹּ֝֗וא חֲלִיפָתִֽי׃ Job 7.1 Job 13.15 Apocalypse 20.13 Matthieu 22.29-22.32 Psaumes 40.1-40.2
¹⁵ תִּ֭קְרָא וְאָנֹכִ֣י אֶֽעֱנֶ֑ךָּ לְֽמַעֲשֵׂ֖ה יָדֶ֣יךָ תִכְסֹֽף׃ Job 10.3 Job 13.22 Job 7.21 Psaumes 138.8 Job 10.8
¹⁶ כִּֽי־עַ֭תָּה צְעָדַ֣י תִּסְפֹּ֑ור לֹֽא־תִ֝שְׁמֹ֗ור עַל־חַטָּאתִֽי׃ Job 10.6 Job 31.4 Job 34.21 Proverbes 5.21 Jérémie 32.19
¹⁷ חָתֻ֣ם בִּצְרֹ֣ור פִּשְׁעִ֑י וַ֝תִּטְפֹּ֗ל עַל־עֲוֹנִֽי׃ Osée 13.12 Deutéronome 32.34 Job 21.19
¹⁸ וְ֭אוּלָם הַר־נֹופֵ֣ל יִבֹּ֑ול וְ֝צ֗וּר יֶעְתַּ֥ק מִמְּקֹמֹֽו׃ Job 18.4 Jérémie 4.24 Matthieu 27.51 Apocalypse 8.8 Psaumes 102.25-102.26
¹⁹ אֲבָנִ֤ים׀ שָׁ֥חֲקוּ מַ֗יִם תִּשְׁטֹֽף־סְפִיחֶ֥יהָ עֲפַר־אָ֑רֶץ וְתִקְוַ֖ת אֱנֹ֣ושׁ הֶאֱבַֽדְתָּ׃ Psaumes 30.6-30.7 Luc 12.19-12.20 Genèse 6.17 Job 19.10 Job 7.6
²⁰ תִּתְקְפֵ֣הוּ לָ֭נֶצַח וַֽיַּהֲלֹ֑ךְ מְשַׁנֶּ֥ה פָ֝נָ֗יו וַֽתְּשַׁלְּחֵֽהוּ׃ Ecclésiaste 8.8 Lamentations 4.8 Job 2.12 Job 14.14
²¹ יִכְבְּד֣וּ בָ֭נָיו וְלֹ֣א יֵדָ֑ע וְ֝יִצְעֲר֗וּ וְֽלֹא־יָבִ֥ין לָֽמֹו׃ Ecclésiaste 9.5 Esaïe 63.16 Esaïe 39.7-39.8 Ecclésiaste 2.18-2.19 1 Samuel 4.20
²² אַךְ־בְּ֭שָׂרֹו עָלָ֣יו יִכְאָ֑ב וְ֝נַפְשֹׁ֗ו עָלָ֥יו תֶּאֱבָֽל׃ פ Job 19.20 Luc 16.23-16.24 Proverbes 14.32 Job 33.19-33.21 Job 19.22