La Bible Bible en Swahili de l’est

Chapitre 49 Chapitre 51

Les sacrifices agréables à Dieu

¹ Mungu, Mungu Bwana, amenena, ameiita nchi, Toka maawio ya jua hata machweo yake.
² Tokea Sayuni, ukamilifu wa uzuri, Mungu amemulika.
³ Mungu wetu atakuja wala hatanyamaza, Moto utakula mbele zake, na tufani yavuma sana ikimzunguka pande zote.
⁴ Ataziita mbingu zilizo juu, Na nchi pia awahukumu watu wake.
⁵ Nikusanyieni wacha Mungu wangu Waliofanya agano nami kwa dhabihu.
⁶ Na mbingu zitatangaza haki yake, Kwa maana Mungu ndiye aliye hakimu.
⁷ Sikieni, enyi watu wangu, nami nitanena, Mimi nitakushuhudia, Israeli; Mimi ndimi niliye MUNGU, Mungu wako.
⁸ Sitakukemea kwa ajili ya dhabihu zako, Na kafara zako ziko mbele zangu daima.
⁹ Sitatwaa ng’ombe katika nyumba yako, Wala beberu katika mazizi yako.
¹⁰ Maana kila hayawani ni wangu, Na makundi juu ya milima elfu.
¹¹ Nawajua ndege wote wa milima, Na wanyama wote wa mashamba ni wangu
¹² Kama ningekuwa na njaa singekuambia, Maana ulimwengu ni wangu, navyo viujazavyo.
¹³ Je! Nile nyama ya mafahali! Au ninywe damu ya mbuzi!
¹⁴ Mtolee Mungu dhabihu za kushukuru; Mtimizie Aliye juu nadhiri zako.
¹⁵ Ukaniite siku ya mateso; Nitakuokoa, na wewe utanitukuza.
¹⁶ Bali mtu asiye haki, Mungu amwambia, Una nini wewe kuitangaza sheria yangu, Na kuliweka agano langu kinywani mwako?
¹⁷ Maana wewe umechukia maonyo, Na kuyatupa maneno yangu nyuma yako.
¹⁸ Ulipomwona mwivi ulikuwa radhi naye, Ukashirikiana na wazinzi.
¹⁹ Umekiachia kinywa chako kinene mabaya, Na ulimi wako watunga hila.
²⁰ Umekaa na kumsengenya ndugu yako, Na mwana wa mama yako umemsingizia.
²¹ Ndivyo ulivyofanya, nami nikanyamaza; Ukadhani ya kuwa Mimi ni kama wewe. Walakini nitakukemea; Nitayapanga hayo mbele ya macho yako.
²² Yafahamuni hayo, Ninyi mnaomsahau Mungu, Nisije nikawararueni, Asipatikane mwenye kuwaponya.
²³ Atoaye dhabihu za kushukuru, Ndiye anayenitukuza. Naye autengenezaye mwenendo wake, Nitamwonyesha wokovu wa Mungu.