La Bible Bible en Swahili de l’est

Chapitre 34 Chapitre 36

Appel à rechercher Dieu

¹ Tena Elihu akajibu na kusema,
² Je! Wewe wadhani kwamba haya ni haki yako, Au je! Wasema, Haki yangu ni zaidi kuliko ya Mungu,
³ Maana wasema, Kutakuwa na faida gani kwako wewe? Tena, Nitapata faida gani, kuliko nikifanya dhambi?
⁴ Mimi nitakujibu, Na hawa wenzio pamoja nawe.
⁵ Ziangalie mbingu ukaone; Na mawingu yaangalie, yaliyo juu kuliko wewe.
⁶ Ikiwa umefanya dhambi, umefanya nini juu yake? Yakiwa makosa yako yameongezeka, wamfanyia nini yeye?
⁷ Ikiwa u mwenye haki, wampa kitu gani? Au yeye hupokea nini mkononi mwako?
⁸ Uovu wako waweza kumwumiza mtu kama wewe; Na haki yako yaweza kumfaa mwanadamu.
⁹ Kwa sababu ya wingi wa jeuri wao hulia; Walilia msaada kwa sababu ya mkono wa wakuu.
¹⁰ Wala hapana asemaye, Yuko wapi Mungu Muumba wangu, Awapaye nyimbo wakati wa usiku;
¹¹ Atufundishaye zaidi ya hayawani wa nchi, Na kutufanya wenye hekima kuliko ndege za angani?
¹² Hulia huko, lakini hapana ajibuye, Kwa sababu ya kiburi cha watu waovu.
¹³ Hakika Mungu hatasikia ubatili, Wala Mwenyezi hatauangalia.
¹⁴ Sembuse usemapo wewe ya kuwa humwangalii, Hiyo daawa i mbele yake, nawe wamngojea!
¹⁵ Lakini sasa, kwa sababu yeye hakukujilia katika hasira zake, Wala hauangalii sana unyeti;
¹⁶ Ndiposa Ayubu hufunua kinywa chake kwa ubatili; Huongeza maneno pasipo maarifa.