Jean 3.27
Les Évangiles en Corse

Ghjesù è Nicodema

¹ À buleghju à i Farusei, ci era unu chì si chjamava Nicodema, un capu di i Ghjudei.
² Andeti à truvà à Ghjesù di notti è li dissi : « Rabbì, a sapemu chì tù sè un maestru mandatu da Diu, chì nimu pò fà issi segni chì tù faci s’eddu ùn hà à Diu cun eddu. »
³ Ghjesù risposi è li dissi : « da veru, a ti dicu à chì ùn hè turratu à nascia ùn pò veda u Regnu di Diu. »
⁴ È Nicodema li dissi : « comu hà da fà, un omu, à nascia quand’eddu hè vechju ? Soca pò vulta una antra volta in corpu à a mamma è nascia ? »
⁵ Ghjesù risposi : « da veru a ti dicu, à chì ùn nasci d’acqua è di spiritu, ùn pò entra in lu Regnu di Diu.
⁶ Ciò chì hè natu da a carri hè carri, è ciò chì hè natu da u Spiritu hè spiritu.
⁷ Ùn ti maraviddà di ch’e’ ti abbii dittu : ‘ci voli chì vo’ torghiti à nascia.’
⁸ U ventu soffia duv’edda li pari, è senti a so boci, ma ùn sai da induva eddu veni è induva eddu và ; cusì hè par ogni omu natu da u Spiritu. »
⁹ Nicodema risposi è li dissi : « è comu pudaria essa ?  »
¹⁰ Ghjesù risposi è li dissi : « tù sè maestru in Israela è ùn la sai ?
¹¹ A ti dicu da veru, dimu ciò chì no’ sapemu è tistimuniemu di ciò chì no’ emu vistu, ma voi, a nostra tistimunianza ùn l’accitteti.
¹² Vi aghju parlatu di i cosi di a tarra è ùn criditi, comu eti da creda s’e’ vi parlu di i cosi di u celi ?
¹³ È in celi, nimu ci hè cuddatu, for di quiddu chì falò da u celi, u Fiddolu di l’Omu
¹⁴ È com’eddu innalzò Musè u sarpenti di bronzu in lu disertu, cusì ci voli ch’eddu sia innalzatu u Fiddolu di l’Omu,
¹⁵ Da chì ogni omu chì credi abbii in eddu a vita eterna. »


¹⁶ « Da tantu chì Diu hà tinutu caru u mondu, hà datu u so Fiddolu solu, da fà chì ogni omu chì credi in eddu ùn sia distruttu ma abbii a vita eterna.
¹⁷ Chì Diu, u Fiddolu, ùn l’hà micca mandatu in u mondu à ghjudicà u mondu, ma par ch’eddu sia salvu u mondu par via d’eddu.
¹⁸ À chì credi in eddu ùn hè ghjudicatu ; à chì ùn credi hè aghjà ghjudicatu, parch’eddu ùn hà cridutu in lu nomu di u Fiddolu solu di Diu.
¹⁹ Eccu un ghjudiziu : a luci hè vinuta in u mondu è l’omini ani tinutu caru u bughju.inveci di a luci; chì i so opari erani gattivi.
²⁰ À chì faci u mali ùn pò pata a luci è ùn s’avvicina da a luci di paura ch’eddi venghini palesi i so opari.
²¹ Ma à chì faci u veru s’avvicina da a luci, da ch’eddu venghi palesu chì i so opari sò stati fatti in Diu. »

Ghjesù è Ghjuvanni u Battistu

²² Dopu, Ghjesù ghjunsi cù i discipuli in Ghjudeia, è quandì dà stava cun eddi è battizaia.
²³ È Ghjuvanni dinò battizaia in Ainoni vicinu à Salema chì quandì dà, ci era monda acqua, è a ghjenti vinia è si facia battizà ;
²⁴ chì tandu Ghjuvanni ùn era ancu statu imprighjunatu.
²⁵ Nascì un cuntrastu trà i discipuli di Ghjuvanni è un Ghjudeiu trattendu si di a purificazioni.
²⁶ È ghjunsini à truvà à Ghjuvanni è li dissini : « Rabbì, sai quiddu chì era cù tecu da Ghjurdanu in dà, è chì tù l’ai fattu u tistimoniu, avà battiza, è vani tutti à truvà lu. »
²⁷ Ghjuvanni risposi è dissi : « un omu ùn pò piddà cà ciò chì li hè statu datu da u celi.
²⁸ Voi stessi seti tistimonii ch’e’ aghju dittu : ‘eiu ùn socu micca u Missia ma li socu statu mandatu da nanzi. ’
²⁹ Quiddu chì hà a sposa, hè u sposu ma l’amicu intimu di u sposu hè quì, u senti è si ralecra à senta a boci di u sposu ; è cusì veni cumpiita a me gioia.
³⁰ Eddu ci voli ch’eddu creschi, ed eiu, ch’e’ sminuischi. »

Quiddu chì veni da u celi

³¹ « Quiddu chì veni da l’altu hè sopra à tutti ; à chì veni da a tarra, di a tarra hè è da a tarra parla ; [Quiddu chì veni da u celi hè sopra à tutti.]
³² Ciò ch’eddu hà vistu è intesu, ni tistimunieghja, è a so tistimunianza nimu a ricevi.
³³ À chì accetta a so tistimunianza, sugella chì Diu hè veru.
³⁴ Chì quiddu chì Diu hà mandatu dici i paroli di Diu : Diu u Spiritu u li dà senza misura.
³⁵ U Babbu teni caru u Fiddolu è li hà datu tuttu in manu.
³⁶ À chì credi in lu Fiddolu, hà a vita eterna ; à chì ùn si fida à u Fiddolu, ùn vidarà a vita, ma li hè à dossu a collara di Diu. »